تعمل إيه لو ذكر القلاووظ إتكسر منك !!
سلسلة القلاووظ - الجزء الثاني
-
Step 1:
القلوظة - الجزء الثاني.
______________________________
إن الدكر يتكسر منك حاجه لا بد و تمر بيها و هيبقا بالنسبالك كابوس لو
متعرفش إزاي تطلعه و ممكن تستسهل و ترمي الشغلانة.
تعمل إيه لو الدكر إتكسر منك !!، و ازاي تتصرف بسرعة و تخرجة بطريقة من التسع طرق.
__________________________________________
إيه اللي بيخلي الدكر يتكسر أصلا ؟
حاجتين ملهمش تالت.
.
1 . تبقي نازل بشكل غير عامودي عالتقب.
.
في الحاله دي لازم تبص كويس الدكر عدل ولا لا ، بالنظر او من خلال زاوية 90.
.
.
2 . تلف البوجي جامد و يبقي في رايش ممانع .. الدكر هيقفش و يتقطم.
.
.
في الحالة دي لو الدكر من M2 لي M6 إستخدم بوجي قصير عشان ميبقاش العزم جامد عالدكر.
أو علي مهلك يا ريس و خد وقتك ، أول متحس انو قفش فكه و دخله تاني.
__________________________________________________
الدكر إتكسر .. يا إما هيتكسر و هيبقا جزء منه بارز لفوق أو غاطس لتحت.
__________________________________________________
1 . سُنبك - Drift pin :
.
(حالة الدكر غاطس).
.
هتجيب القطعة اللي اتكسر فيها الدكر و تحطها علي حاجه متمتصش الصدمات زي تزجة حديد و تدق علي السنبك باستخدام مطرقه تقيلة لحد ما الدكر يتفتت.
.
__________________________________________________
.
2 . تلحم في الدكر صامولة لحام أرجون :
.
(حالة الدكر بارز).
.
هتلحم الصامولة لحام أرجون في الدكر و تفك الصاموله بمفتاح بلدي بإتزان ، او تحط مفتاحين فوق بعض عكس عكاس كأنك ماسك بوجي.
.
ممكن يبقي لحام كهربا.
ملحوظة : لازم تحط ورده عالدكر عشان اللحام لو إيدك إتهزت ميلحمش الدكر في الشغلانه اللي بتقلوظها ، حط ورده في أي عملية لحام عالدكر.
__________________________________________________
.
3 . مكنة لحام كهربا - Arc welding :
.
(حالة الدكر الغاطس).
.
هتعلي كهربة المكنة و تملا لحام فوق الدكر بحرفية في النص !!
.
انت لما تعمل كدا خامة الدكر بيتاثر بالحرارة ، فهتجيب سنُبك و تدق عليه لحد ما يتكسر.
________________________________________________
4 . بإستخدام متقاب :
.
(حالة الدكر الغاطس).
.
لو ربنا كرمك ولقيت بنطة كربيد كويسه تاكل في خامة الدكر ، لازم في الاول تساوي الدكر بديسك صنفرة عشان ميبقاش فيه نتوء تخلي البنطة تتلم.
.
هتنزل ببنطة صغيرة و بعدين الاكبر لحد متفوره.
.
____________________________________________
5 . كلابة أو زرادية :
.
(حالة الدكر البارز).
.
بإستخدام زرادية أو كلابة هتفك الدكر .. عيب الطريقة دي إنك لو مسكت الدكر جامد شوية هيتكسر منك ، الموضوع محتاج خفة يد
.
___________________________________________________
6 . لحام أرجون TIG welding :
.
(حالة الدكر البارز منه جزء صغير)
.
هتملا لحام فوق الدكر عشان تعرف تتحكم فيه و تلاقي حاجة تمسكه منها.
هتجيب زرادية و تمسك منها الدكر و تلفه.
.
___________________________________________________
7 . مكنة سبارك - EDM machine :
.
(الحالتين)
.
لو الدكر اللي إتكسر M10 مثلا الإسبارك هتنزل ب7 ميللي (الإلكترود).
طيب و الباقي هيروح فين ما قطر الدكر 10 ميللي مش 7 ميللي ؟!
.
لما تشيل 7 مم من النص في قلب الدكر السنون هتقع لوحدها عشان الدكر تصميمه السنون بارزة و انت شلت القلب اللي ماسك السنون . فالسنون هتقع لوحدها.
.
كده انت حافظت علي التقب و القلووظ
.
الحل دا متعارف عليه و عملته أكتر من مرة ، في مكن إسبارك كتير في العاشر من رمضان.
.
_____________________________________________________
8 . خلاعة دكر قلاووظ - Tap extractor :
.
(الحالتين)
.
كل دكر و ليه مقاس خلاعة ، بتركب الخلاعة في الFlute (المجرى اللي في الدكر اللي هما في العادة 4) و تفك ، دورة عليها في محلات العدة و ملقتهاش .. لو حد يعرف الاقيها فين.
.
______________________________________________
9 . لمبة قطعية - Cutting Torch :
.
(الحالتين)
.
هتوجه اللمبة عالدكر ، بعد كدا هتدق عليه بسمبك.
______________________________________________
.
.
يتبع
.
ملحوظة : يتم تحديث المقال بإستمرار
.______________________________________________
القلوظة الجزء الثالث :
https://www.facebook.com/ayman.kidwany/posts/3763187180409079
.
القلوظة الجزء الأول :
https://www.facebook.com/ayman.kidwany/posts/3317629348298200
.
إزاي تمنع الصدأ :
https://www.facebook.com/ayman.kidwany/posts/3251613241566478
.
.
.
.
